Umaga

Ang pagsibol ng umaga’y tanglaw

Sa kaisipan ay nagsilbing ilaw

Panaginip sa kawalan ay sinaklaw

Gising para sa panibagong galaw.

Umagang kay ganda’t marikit

Minumulat ang matang nakapikit

Isang salubong at yakap na mahigpit

Ang hatid ng araw na kaakit-akit.

Sa bawat umagang  gumigising ng kamalayan

Pag-asa’t agam-agam ang hatid sa kaisipan

Payapa’t masaya ang alay sa puso naman

Para sa tulad kong nangangailangan.

Batid ng isipa’y malinaw na daloy ng diwa

Sa puso’y pagmamahal ang nangangasiwa

At ang natatanging dasal sa umagang darating

Katabi ang taong nakalaan sa aking piling.