Tinig Na Walang Kapantay

Samu’t saring tinig ang aking naririnig.

Iba’t ibang emosyon ang iyong ibinabatid.

Tinig mo ang kasabay sa mga araw na matatamis

Tinig mo rin ang yakap sa mga oras ng hinagpis.

Dinig na dinig ko ang iyong malambing na tinig. Ako’y iyong kinakausap. Sinasabi mong ako’y isang biyaya…na ako’y isang anghel mula sa langit…na ako’y iyong dasal na naisakatuparan. Tinig na bumuo’t nagpalakas sa akin.

Dinig na dinig ko ang iyong tinig ng pagkasabik sa unang pagbuka ng aking mga mata at sa tuluyan kong paghakbang at pagbigkas na kung saa’y una mong narinig ang mumunti kong tinig. Tinawag kita’t ika’y napaluha sa tuwa.

Dinig na dinig ko ang iyong tinig ng paghele sa mga gabing di ako mapalagay sa init at gutom. At tanging ang tinig mo lang ang nagpatahan sa akin. Tuluy-tuloy lang ang awit mong kasinglamig ng gabing mahimbing.

Dinig na dinig ko ang iyong tinig ng pag-aruga’t paggabay sa aking pagpasok sa eskwela. Sa tinig mong nagsasabing mag-aral ako nang mabuti upang makapagtapos at makahabi ng maganda’t tiyak na kinabukasan.

Dinig na dinig ko ang iyong tinig ng tuwa’t pagkagalak taon-taon sa pag-akyat mo sa entablado upang isabit sa akin ang mga medalya’t karangalang aking nakamit.

Dinig na dinig ko ang iyong tinig ng pagkagalit sa mga di kanais-nais kong nagawa na di mo nagustuhan. Tanging ang tinig mong iyon  lang ang nakapagbabagabag sa akin kaya’t dali-dali akong humihingi ng tawad at nagiging payapa kapag ako’y niyakap mo na.

Dinig na dinig ko ang iyong tinig ng pangaral tuwing ako’y lumalapit at humihingi ng kalinga sa mga panahong ako’y nalilito sa trabaho, pag-ibig at sa lahat ng komplikasyon sa buhay. At tanging sa iyo lang nakaaatim ng kaliwanagan ng puso’t isipan.

Dinig na dinig ko ang iyong tinig ng pagmamahal. Tinig na nanggagaling sa mga katagang iyong binibitawan. Tinig na nanggagaling sa mapupungay mong mga mata. Tinig na nanggagaling sa haplos ng iyong mga kamay. Tinig na nanggagaling sa puso mo, INAY.

Iisang tinig na walang kapantay.

Sana ay tulad mo ang mga tinig nila. Nagkakalinga. Nakauunawa. Hindi naninira. Hindi nanghuhusga.